斯巴達撲殺費倫巴治

猪拉多纳

今日歐陸連線輪到Anton出場，同大家研究其祖家俄羅斯球隊莫斯科斯巴達主場對土耳其費倫巴治。由於已經到咗歐聯外圍賽最後一輪，兩回合勝出嘅一方可以參加歐聯分組賽，對財政收入關係重大，今仗兩軍實力相當接近，俄羅斯聯賽進行得如火如荼，莫斯科斯巴達狀態遠勝未開咧嘅費倫巴治，首回合主場出擊有力先拔頭籌，Anton捧1.88倍主勝。

（有線61及201台周三凌晨零時直播）

莫斯科斯巴達係車路士奪得上屆歐聯冠軍嘅受害者，原本佢哋應該直接踢分組賽，但車仔捧盃後加上英超前三名球隊，四隊都可以直接踢分組賽，斯巴達被迫要踢多一場附加賽，仲要抽中實力唔曳嘅費倫巴治，認真唔好彩。
費軍未谷起多甩漏

不過，斯巴達自季中由前華倫西亞教練艾美利接手後確有進步，近五場俄超聯賽贏咗四場，已經進佔次席，呢班波近期除大勝莫斯科戴拿模外，其餘勝仗都係僅僅熟，艾美利仲經常要靠尾段冒險，用前鋒換後衞搏殺至贏到，場上表現唔算搶鏡。但斯巴達注重實效，佢哋上輪聯賽主場對住魯賓卡山好大段時間都處下風，但最終艾美利仍然可以帶領球隊贏波，所以今場如果求好分，大家可以諗下小注3.45倍嘅「讓球和」。

為寫呢段稿，Anton同幾位土耳其戰友傾過費倫巴治，呢班波上季因為假波事件無緣歐戰，今屆外圍賽上圈倚靠次回合作客大勝羅馬尼亞球隊華斯路伊晉級，但一班土國朋友對佢哋嘅表現彈多過讚，尤其防線漏洞多多根本未執掂，今仗主力門將迪美利因傷預料難以趕及上陣，首回合作客去到俄羅斯輸一粒已經收貨。