曼聯血洗愛華頓

猪拉多纳

睇完兩晚首輪英超，壓軸仲有場愛華頓主場對曼聯等住你！上季「紅魔」失落聯賽冠軍，好大程度係因為臨過終點嗰陣，畀「拖肥糖」逼和打窒條氣，試問呢場仇人見面，「紅魔」又點會留手？何況未開咧，有尹佩斯、香川同朗尼坐鎮嘅曼聯已成為「公投冠軍」，被睇好王者歸來，1.8倍客W抵捧！（有線200、300及廣東體育周二凌晨3:00直播）
網站投票曼聯最多人撐

阿仙奴隊長尹佩斯係曼聯近年最令球迷興奮收購，加上多蒙特中場香川真司加盟，呢兩位仁兄配合朗尼合組喪攻鐵三角，鋒力可以話勁到無堅不摧。咪忘記隊長兼防線核心尼曼查維迪長抖1季後復出，現時曼聯嘅戰鬥力，絕對比上季強幾倍，難怪最近網站goal.com進行調查，發現37.32%球迷認為曼聯最有機會奪得今季英超冠軍，相反，零重要收購嘅死對頭曼城被睇衰得12.55%排第4位。
愛華頓放走3將戰力減

其實球迷睇好曼聯唔係冇道理，事關佢哋上季只不過因得失球差唔及曼城，先至會痛失聯賽錦標，當中關鍵賽事係主場領先3:1，最後被愛華頓逼和4:4嗰場波，除非一眾「紅魔」集體失憶啦，否則肯定會記得呢次教訓，更何況尹佩斯加盟聲稱想要獎盃多過為錢，今鋪造訪愛華頓嘅葛迪遜公園球場，肯定會入多兩粒證身價，證明自己唔係講大話。

仲有就係，曼聯已經連續3季開咧戰贏波，對上3季頭3場聯賽有7勝1和1負，相反對家嘅愛華頓，放走中場卡希爾、麥法頓同魯迪維爾後，只係補充格拉斯哥流浪前鋒賴史密夫，同埋回購熱刺翼鋒派拿，牌面仲差過上季，而且曼聯出身嘅「拖肥糖」隊長菲臘尼維利，會唔會忍心連續兩次阻「紅魔」發達？自己諗啦！
愛曼對決旺開大

‧近6次對賽4次開入球大。

‧自04年後，曼聯未曾於開咧戰落敗。

‧曼聯上季英超作客有13勝3和3負。

‧曼聯上季頭槌入16球，獲11球12碼為英超最多。

‧愛華頓上季頭14場聯賽輸8場。

‧紅魔連續5場友賽開半和。
朗尼讓路益尹佩斯開首球

曼聯事先張揚話會畀新加盟嘅尹佩斯打正選，據英國傳媒估計，佢會好似喺阿仙奴同荷蘭國家隊咁打正箭頭，朗尼墮後支援佢，至於同樣係新簽嘅香川真司就靠左邊搵食，咁講法，上季攻入30球成為英超神射手、兼有9場聯賽先開紀錄嘅尹佩斯，梗係呢場首名入球嘅不二之選啦！