小心！鋒力勁角球未必多

猪拉多纳

勁旅火力強多入波，但就未必係角球多嘅保證，例如阿仙奴咁，雖然鋒力勁爆，但佢哋以地面進攻為主，落到底線都傳返出禁區，角球自然冇想像中咁多。反而實力唔曳，但把握力麻麻嘅利物浦，原來先係角球大Fans嘅銀行隊！上季紅軍平均單場製造8.21個角球，幾乎自己一隊都可以開個角球大，絕對係英超角球王。
紅軍先係英超角球王

紅軍上季中柱中楣特別多，但原來佢哋嘅傳中同射門，亦經常畀對方守衞解圍出底線。翻查數據，上季英超2場最多角球數嘅賽事都有利物浦份，分別係佢哋作客昆士柏流浪（QPR）同布力般流浪（24個角球）。同時，紅軍主場鬥QPR都有22個角球，呢個對碰組合大家真係要(目及)實。

至於以手榴彈戰術見稱嘅史篤城，可能因為偏好界外球，佢哋上季嘅平均角球數只得4.47個，唔計3支降班球隊，佢哋係排尾2。其中最恐怖係史篤城作客數據，平均只得3.42個角球，上季佢哋造訪阿士東維拉場波，自己全場0角球，維拉就得3個，成為全季第2少角球數嘅比賽。