韓日「大」戰東瀛新星騷哥利

猪拉多纳

南韓男奧足今晚同日本男奧足爭銅牌，絕對唔係例行公事，當中南韓球員要贏波換取免服兵役，日本新仔要博表現轉會或者加人工，既然雙方都有所求，應該唔會踢悶波，加上日本教頭關塚隆其實玩開喪攻，季軍戰隨時回復真我落柯打鬥攻，2.1倍入球大抵捧！（有線18、63及203周六凌晨2:45直播）
博免服兵役轉會加人工

南韓4強吞巴西男奧足3蛋，好大原因同後衞金昌洙、門將鄭成龍兩個「超齡球員」8強受傷，搞到防線亂龍有關。事實上，呢次南韓召入星級陣容，射手朴主永、前鋒池東沅、隊長具滋哲同中場寄誠庸全部喺歐洲球會効力，呢場肯定會搏命攻破日本大門，失得又入得要玩大佢。

對家日本喺4強以1:3慘負墨西哥男奧足，季軍戰撞正冤家南韓難免更肉緊，更何況中場清武弘嗣、東慶悟同宇佐美貴史仲未有波入，試問佢哋點會想空手而回？東瀛傳媒更大爆，現時日本人工最低嘅齋藤學得500萬日圓年薪，相反同期職棒球員年薪最高6,000萬日圓，為咗吸引歐洲球會羅致，又或者氹球會加人工，有份落場嘅應該會把握機會入波顯身價。
賽制：

季軍戰以一場過分勝負，若法定時間內打成平手，需加時作賽，再和則互射12碼決勝。