巴西煲魚生粥趁熱食

猪拉多纳

奧運男足進入最後4強階段，今晚就有傳統勁旅巴西迎戰亞洲「太極虎」南韓喇！上場南韓靠住頑強鬥志鬥到互射12碼，卒之淘汰咗東道主英國，真係睇到拍爛手掌，小妹相信佢哋今場有力同「森巴兵團」合演一場高水準大戰，但係對住質高嘅巴西，最後難免小敗，一於敲3.35倍「讓球和」啦！

（有線18、63及203周三凌晨2:45直播）

有睇巴西喺8強戰對洪都拉斯嘅球迷，應該對「森巴兵團」嘅表現有啲失望，小妹絕對唔懷疑呢班年輕球星嘅質素，但係上場就明顯有啲輕敵喇！不過從好嗰方面去睇，班巴西小將上場嚇一嚇之後，對住表現搶鏡嘅南韓應該唔會再咁心散，其中隊長堤亞高施華就喺賽前大讚「太極虎」跑動夠積極、傳球質素高，其實小妹話佢係想提醒班隊友今場醒醒定定就真。
南韓發布尼馬插水戒備令

雖然睇好巴西贏波，不過小妹就唔認為佢哋可以大勝，皆因一班「森巴兵」喺今屆奧運男足踢4場失咗5球，防線演出明顯唔夠穩陣，反觀南韓4場只係失咗2球，尼馬、侯克等巴西射手雖然有力射穿佢哋條防線，但係想大炒就有啲難度，何況南韓仲落埋「尼馬插水戒備令」，明顯會重點照顧幾個森巴球星。

南韓今場最致命嘅打擊，係上場傷出嘅鐵閘金昌洙同埋正選門將鄭成龍多數避戰，加上贏英國後球員其實已經耗盡體力，只係靠意志力撐住，今場頂唔頂到90分鐘都成問題！好彩嘅係新特蘭射手池東沅上場正選上陣即刻有波入，拍住朴主永嘅話，有機會喺巴西身上偷雞，只可惜佢哋上場體力消耗得太勁，對手又質素超群，今場力戰而敗都算有交代喇！
奧足淘汰賽賽制

今輪為4強戰，以一場過分勝負，若法定時間內打成平手，需加時作賽，再和就互射12碼分勝負。