紅魔晒冷撲擊華拉倫加

猪拉多纳

今個星期展開季前熱身賽第二波歐洲之旅嘅曼聯，今晚第一站會喺挪威奧斯陸出戰挪超中游分子華拉倫加。賽前紅魔鬼領隊費格遜保證會強陣出擊，一眾踢完歐國盃嘅星級主力都會歸隊，加上後防硬漢尼曼查維迪復出，唔難大勝一場，1.62倍「讓球客勝」要捧！（now640台周日晚10:00直播）

紅魔鬼喺上月中嘅首階段季前賽亞非之旅，雖然錄得2勝1和成績，但所贏2場波都只係小勝1球，表現唔算討好。當然，當時佢哋嘅陣容根本未算完整，只得卡域克、史高斯同新兵香川真司等孭飛，配合部分小將落場，賽績演出根本不足為據。
費Sir拍心口強陣出擊

不過，以朗尼、艾舒利楊格同艾拉為首嘅6個歐國盃戰將，上周已經歸隊復操，費Sir話明為咗要佢哋趕及迎接新季展開，嚟緊對華拉倫加、巴塞隆拿同漢諾威嘅3場熱身賽，都一定會盡遣強陣出擊，期望操起佢哋狀態。仲有嘅好消息係，因為膝部韌帶重創抖咗8個月嘅後防重心尼曼查維迪亦已傷愈，可以正式復出，唯一係啱啱由奧運歸隊嘅西班牙門神迪基亞或會操多幾課先落場，但佢哋都仲有丹麥門將連迪加特頂住，一樣無後顧之憂啦！
華拉倫加3日踢2場

紅魔鬼實力超班加上鬥心足，反觀對手華拉倫加正值挪超季中，周六凌晨先至踢完場聯賽，隔得一日又要出擊，體力難免輸蝕。呢支目前喺挪超排第6嘅球隊，今仗會有前鋒尤素夫干尼同中場奧古迪養傷缺陣，陣內最大牌就只得前熱刺門將夏舒菲特同前韋根中場基斯杜化希斯特，實力根本有限，就算話有主場之利，對住來勢洶洶嘅要紅魔鬼，都係等炒格。