8強焦點戰 日本蓄銳爆巴西

猪拉多纳

女子奧運足球今晚上演四場半準決賽，最矚目係應屆世界盃冠軍日本硬撼有女球王瑪達壓陣嘅巴西。日本上仗收起了大部分主力，目的就係留力博今仗，最有利係佢哋連續兩仗留在威爾斯卡迪夫比賽，唔使舟車勞頓，日本過去兩次面對巴西都贏波，往績上亦有優勢，「讓球主客和」巴西讓一球，波童捧日本「讓球客勝」。（有線63及203台周六凌晨零時直播）

呢兩日「打假波」成為咗奧運熱門話題，其實女足最後一輪分組賽都出現疑似「打假波」，日本喺穩得出線權嘅情況下，面對南非作出了7名球員調動，結果最終跟對手互交白卷。後衞岩清水梓賽後承認係教練佐佐木則夫故意以次名出線，目的係想踢完上場後繼續留在卡迪夫比賽，唔使球員飛嚟飛去消耗體力。姑勿論係真係假，日本多名主力澤穗希、川澄奈穗美、大野忍經過上場休息，今仗勢如猛虎出柙，飢渴感十足。
巴西唔Sharp 日本往績佳

巴西最後一仗不敵東道主英國，表現冇厘神氣，有傳媒指森巴女將專登以次名出線，希望能在四強避開熱門美國。如果巴西真係咁諗就大錯特錯，事關佢哋過去兩次面對日本分別以一比二及一比四落敗，而且以佢哋頭兩場表現，對住近兩場都冇失波、養精蓄銳嘅日本根本亦冇必勝把握，分分鐘連八強都過唔到。

巴西女球王瑪達由06年開始連奪五屆世界足球小姐，直到上屆才被「女版戴志偉」澤穗希打破壟斷，今次兩人同場獻技，就算唔投X亦睇頭十足，絕對不容錯過。
英國當銳可勝加拿大

尾場八強賽事，東道主英國迎戰加拿大，英國上場擊敗爭標熱門之一巴西，分組賽三戰全勝兼一球不失，主場氣勢逼人。加拿大只以小組第三名資格晉級，無論攻守都只係二流水準，主W有2倍抵玩。（有線63及203台周六凌晨2時30分直播）