巴西瞓醒搵白俄省招牌

猪拉多纳

衝金熱門巴西男足喺C組首戰煲魚生粥，今晚再度出擊鬥白俄羅斯，唔多唔少嚇窒捧場客。之但係亨格比利一啲都唔擔心，事關上場對埃及臨尾輸番兩粒，已經搞到「森巴兵團」冇晒面，今晚打醒十二分精神嘅話，白俄邊夠資格做攔路虎吖？巴西「-2」照撐1.9倍「讓主」！（有線18、63及203周日晚10:00直播）

巴西喺首場分組賽用咗半粒鐘就喪入3球，諗住佢哋仲有得炒啦，點知下半場就走晒樣，最後只係險勝埃及3:2，賽後隊長堤亞高施華話呢個Wake Up Call嚟得合時，前鋒尼馬仲拍心口承諾今仗要改善表現，照計應該唔會好似上仗咁蝦碌。

查實由尼馬、侯克同李安度達美奧組成嘅三箭頭已經把炮，新「10號」奧斯卡杜斯山度士畀啲波又咁靚，邊使愁冇波入吖，為面子同出線唔似會揸流攤。對家白俄首戰有24腳攻門，但最終只係贏得新西蘭1:0，證明把握力都幾曳，巴西上仗幾乎踩蕉皮，今鋪冇咁易畀你攻破大門，冇星兼冇卡士嘅白俄想偷雞都難！

男奧足C組