英國讓波唔怕反

猪拉多纳

奧運男足A組賽事，東道主英國於溫布萊撲擊阿聯酋，論名氣英軍點止贏一條街，但計表現，阿聯酋絕對唔失禮，如非主辦國及名牌效應，英軍點讓超過一球呀！首輪分組賽吹冷風，今次蘇豪再博阿聯酋不敗，冷敲「讓球客勝」！（有線63及203台周一凌晨2時45分直播）

英國首戰塞內加爾上半場憑比拿美先開紀錄係威係勢，再睇落去其實普普通通咋喎！進攻踢來踢去都係傑斯同比拿美，箭頭史杜列治冇態，後備前鋒蘇杜爾唔知想點。換邊後塞內加爾反客為主，最終追和合理，甚至有權贏埋。講真，呢隊英國係咁多料，領隊皮雅斯又唔係莫連奴，無力創造奇迹。話就話主辦國鬥志好，喂！奧運嚟o架，唔通啲參賽國鬥志唔好咩！

咁阿聯酋又點先？講星就冇乜o架喇，但踢落都幾對辦，首戰面對烏拉圭逼到對手氣咳，超齡射手伊斯美馬達爾交到貨，中場指揮官阿都拉文打法大路，分波有紋有路，演出搶鏡，相信有唔少歐洲球會食指大動。阿聯酋名氣欠奉，勝在班球員夾得熟，反擊甚具威脅，真係唔曳o架！今仗兩隊差距冇想像中咁大，既然英軍讓得多，不如博一博「讓球客勝」喇！
烏拉圭塞內加爾「大」火併

同組烏拉圭男奧足對塞內加爾男奧足，烏拉圭兩大射手蘇亞雷斯同卡雲尼上場明顯未上力，首仗仍能反勝阿聯酋，堅贏質素，冇計！經過一場熱身後，相信烏拉圭會踢得更好，但塞內加爾行軍快速，反擊力強，有力爭取士哥，預期兩隊會炮製入球騷，呢場捧大盤穩陣。（周一凌晨零時開賽）