蒙彼利埃添食有里

猪拉多纳

象徵球季開鑼嘅法國冠軍盃周日凌晨於美國中立場舉行，由上季聯賽盟主蒙彼利埃鬥法足盃冠軍里昂。蒙彼利埃上季歷史性首奪聯賽冠軍，法冠盃自然想添食，睇番兩隊近期熱身賽表現，蒙彼利埃明顯亦比里昂優勝，平手盤波童捧蒙軍。（now 714周日凌晨3時直播）
近3場熱身賽贏晒

為拓展法甲海外市場，對上3屆法冠盃先後於加拿大、非洲突尼西亞同摩洛哥舉行，今屆則首次移師美國上演。為適應當地天氣，兩軍早前分別約戰兩支美職球隊作為熱身，蒙彼利埃以3比0擊敗目前於美職東岸排第2嘅肯薩斯體育會，里昂則以1比1打和中游隊伍蒙特利爾衝擊，論狀態明顯以蒙彼利埃稍勝一籌。
里昂對盃仔興趣不大

蒙彼利埃今夏放走了王牌前鋒基奧特，但買入嘅新球員亦頗具質素，來自智利艾斯賓路拿嘅艾曼紐希亞拉及昂熱射手查邦尼亞包辦上場對肯薩斯嘅3個入波，證明冇入錯貨，另來自尼斯嘅莫尼亞擅射之餘，亦可於邊線發難，個人搵食能力尤勝基奧特，從佢哋近3場熱身賽全勝兼轟入8球所見，攻擊力尤勝上季。

里昂今季變動唔多，只有邊緣球員中場艾達臣及後衞文沙離隊，仍然依靠利辛度盧比斯、哥古夫、米高巴斯圖斯等孭飛，不過佢哋季前3場熱身賽未贏過，狀態一般，而且佢哋對上3次出席法冠盃，只有一次能喺法定時間內贏波，似乎對呢隻盃仔唔太重視，首次角逐嘅蒙彼利埃喺決心方面肯定贏晒。