美國巴西「讓球勝」繼續跟

猪拉多纳

有人話奧運女足好睇過男足，所言非虛，好似奪金大熱美國女足咁，首仗反勝歐洲勁旅法國女足，表現令人刮目相看，今場對住連北韓女足都打唔贏的哥倫比亞女足，看來「美女」會繼續為球迷獻上一場精彩「大」騷。（有線63及203台周日凌晨零時直播）

有睇上仗美國點樣反勝法國，就見識到「美女」幾咁超班，初段落後兩粒一啲都未驚過，半場未完三扒兩撥便追平，易邊後輕輕鬆鬆入多兩粒，其中梅開二度的雅歷絲摩根表現sharp醒，配合中場萊德的鋪橋搭路，法國縱有里昂球星妮絲比在陣，都完全唔夠打，可見班「美女」有幾超班！

反觀對手哥倫比亞，上仗表現實在差勁，尤其係龍門絲佩維達演出慌失失，遇上狀態大勇的雅歷絲摩根，隨時任人魚肉係咁輸。呢場個大盤非常穩陣，美國讓兩球「讓球主勝」亦諗得過。

同日較早時間開賽嘅巴西女足對新西蘭女足，當然係巴西秤先好多。從首仗大勝喀麥隆可見，森巴女將一樣流住「進攻的血」，全場攻勢水銀瀉地，「女球王」瑪達略為墮後校炮都省兩粒，另一射手姬絲蒂安妮後備入場亦有士哥，火力十足唔愁冇波入。況且新西蘭只屬魚腩，上仗僅輸一球只因英國女足把握力曳，對住強隊巴西凶多吉少，呢場大盤及「讓球客勝」可兼投。（有線63及203台周六晚9時30分直播）
瑞典高妹唔怕「瀛女」

另外，世界冠軍日本女足，今仗要硬撼瑞典女足，儘管「瀛女」首仗旗開得勝，但表現唔算突出，相反瑞典打出氣勢，大勝南非四個一皮，佢哋面對防線高度偏矮的「瀛女」，有一定頭槌優勢，相信瑞軍可全身而退，「讓球客勝」係唔錯選擇。（有線63及203台周六晚7時直播）