皇馬作客照o趙賓菲加

猪拉多纳

西甲衞冕冠軍皇家馬德里今晚空降葡萄牙里斯本，同主隊賓菲加爭奪「尤西比奧盃」，就算「銀河艦隊」有C朗等大部分主力未歸隊，仍然有幾個超班巨星撐場，要踢散賓菲加絕對冇難度，一於捧2.2倍客勝啦！（now632台周六凌晨2:00直播）

由西班牙及葡萄牙國腳組成嘅皇家馬德里，大部分主力踢完歐國盃之後仲放緊假，賓施馬歸咗隊亦只係兩日，唔在陣嘅自然包括巨星C朗啦，不過大家又唔使太失望，有迪馬利亞、希古恩等南美兵撐場，都叫有睇頭啦！睇番上場對奧維多嘅熱身賽，主帥莫連奴就算派出大部分青年軍，一樣夠炒奧維多5:1，其中19歲嘅射手莫拉達仲大口氣話「莫佬」都知佢已經準備好上一隊，小妹相信佢都會交足貨證明自己，至於上場因胃痛缺陣嘅紐尼沙軒，今場應該可以復出，相信呢位土耳其國腳會搏盡爭表現，希望擺脫上季長坐冷板嘅命運。
賓菲加缺少西班牙奧運腳

對手賓菲加近6場熱身賽得4勝1和1負，近況好似唔差，但係大部分勝仗對手都係來自次級聯賽球隊，一對里爾、燕豪芬等勁旅就即時現形，再者佢哋都一樣唔齊腳，前鋒洛迪高摩連奴就要代表西班牙出戰奧運，今場對住實力超班嘅皇馬，都幾難搵到食喇。
橫數千軍

 賓菲加友賽多波入

‧ 6場熱身賽有4場開大。

‧近10次主場僅得1敗。

 皇馬跨季直落贏8場

‧近11戰有10場總入球3或以上。

‧連熱身賽取得跨季8連勝。