英國做東請食生「塞」

猪拉多纳

萬眾期待嘅英國男奧足今晚喺A組出擊，喺奧脫福主場迎戰非洲嘅塞內加爾，雖則話呢隊「皮家軍」實力未如想像中強，但佢哋擁有傑斯同比拿美為首嘅「威爾斯四大天王」攻堅，點計都秤高一線，計埋東道主地利優勢，英國要小勝而歸應該冇問題，1.57倍熱W抵玩！（有線61、201周五凌晨3:00直播）

今屆奧運英國隊以為可以匯聚英倫三島四地精英，但最後只係組成英格蘭同威爾斯聯隊，最慘係唔少球會都借啲意唔放人，一眾大國腳踢完歐國盃又全部免役，結果家陣呢隊英奧足，所有希望都幾乎擺晒喺班威爾斯兵身上。

睇番今次主帥皮雅斯徵召嘅威爾斯5虎中，包括隊長傑斯、快翼比拿美、天才中場艾朗藍斯同超新星祖阿倫正正係英國嘅進攻核心，當中傑斯嘅影響力唔需要多講，祖阿倫則係上場熱身賽英國不敵巴西嘅唯一亮點，只要佢哋幾個生生性性，應該有把握撕破塞內加爾防線。
塞內加爾缺星級雙煞

至於塞內加爾呢邊，主帥高圖用盡辦法都冧唔掂紐卡素放人，兩大星級射手柏比斯施斯同丹巴巴亞都無緣今屆奧運，18人大軍搵個孭到飛嘅都冇。再者，舊年喺U23非國盃僅得殿軍，只靠附加賽擊敗阿曼先攞到奧運資格嘅佢哋，實力根本係有限公司，主帥高圖點兵更只揀咗3名前鋒，最巴閉已經算係効力奧沙辛拿嘅前鋒伊巴希馬巴迪，擺明係想以守行先。

不過正所謂久守必失，塞軍今鋪對住東道主英國，要應付埋全場爆滿嘅英國球迷，恐怕都難以守足90分鐘，僅敗而回係正路，要1.57倍W穩陣，夠狠嘅甚至博埋3.3倍「讓球和」添！