日本大變身 無懼小狂牛

猪拉多纳

倫奧男足今晚勁爆Kick Off！歐洲冠軍西班牙喺D組遇上亞洲一哥日本，未必開到W。雖然西班牙近年橫掃各大錦標，但今次入選嘅「小狂牛」西班牙男奧足斤両未足，相反日本男奧足有7件代表過大國腳出戰，領隊關塚隆仲打算翻炒南非世盃「大變身」勝利方程式，受讓隨時開到2.52倍「讓球客勝」！（有線61及201、中央5台周四晚9:45直播）
西班牙缺少超班球星

最近兩年，西班牙拎到2次U19歐國盃冠軍、1次U21歐國盃錦標，稱得上天下無敵。不過呢次西班牙牌面唔算特別勁，真正為大球會効力又有得打正選嘅，其實得馬體會射手阿祖安盧比斯、車路士中場桑馬達、巴塞左閘佐迪艾巴同曼聯門將迪基亞，唔叫得特別超班。

當然，賓菲加前鋒洛迪高摩連奴、畢爾包中場查維馬天尼斯同馬賽後衞艾斯派古達，質素肯定唔低，但問題係日本球員出名夠拚勁，點會隨便投降？更何況，今次日本有7件曾經為大國腳上陣，後防佔5個，當中被選為隊長嘅超齡球員吉田麻也，更加係日本國家隊正選中堅。
日本7件大國腳孭飛

更重要嘅係，曾經執教川崎前鋒嘅關塚隆，今次棄用鹿島鹿角射手大迫勇也同阿仙奴翼鋒宮市亮，反而重用以往好少踢奧運隊嘅賀芬咸前鋒宇佐美貴史，東瀛傳媒覺得，關塚隆咁做係學南非世盃前，岡田武史將日本國家隊大執位，置之死地而後生，激發球員競爭意識。

由於西班牙奧運隊球員未真正成熟，講波底踢慣地面戰嘅日本唔會輸蝕太多，鬥體力甚至應該有優勢添。大家知啦，依家西班牙主要靠中路突破，對住日本緊密嘅聯繫未必咬得入。相反，最近過檔弗賴堡嘅清武弘嗣被視為東瀛足球天才，西班牙近排試過淨吞塞內加爾雙蛋，隨時畀佢射爆！

男足D組