花旗女將食「老」本 打沉法國響頭炮

猪拉多纳

奧運女足今晚開打，G組會由衞冕嘅美國打頭陣面對法國，「花旗女將」今次倫奧食「老」本，靠晒雲芭芝、博絲同拉姆邦妮呢啲老將孭重飛，計實力同大賽經驗都喺法國之上，1.8倍主W當然信得過。（有線18周四凌晨0:00直播）
失落世盃勁操爭金牌

從未缺席奧運嘅美國女足，除咗喺00年屈居亞軍之外，其餘3屆都全部奪金，今次順理成章被捧為金牌大熱。去屆因為斷腳無緣京奧嘅32歲射手雲芭芝經驗與技術兼備，配合後上能力極強嘅艾美洛迪古絲同萊德合組攻擊鐵三角，火力已經得人驚，後面仲有「美女門神」蘇露把關，有前有後問你點頂？

最重要係美國上年失落世界盃之後，中場奧蕾莉自爆成班手足都耿耿於懷，今次征奧操得特別狠，擺明想搵列強出氣。反觀近年走青春路線嘅法國無疑係有活力，但佢哋上年喺世界盃面對德國、美國同瑞典呢嘅「實力派」都全數敗陣，戰鬥力始終同一線勁旅有距離，睇怕今戰都好難偷到雞。

女足G組