FC上海同曼聯玩舖大

猪拉多纳

經過南非兩場熱身後曼聯來到中國搵人仔，13年後再次與中超勁旅FC上海（上海申花）決戰。FC上海擁有「車仔雙雄」杜奧巴同安歷卡，加上有傳FC上海老闆朱駿技癢想落場比賽，預計雙方會合演一場極具娛樂性的入球騷，捧大最好。

（now 640周三晚8時直播）
車仔雙雄逼紅魔認真

老實講，曼聯頭兩場熱身賽狀態麻麻，甚至可以用hea踢來形容，一來搭飛機都搭到暈，二來領隊費格遜的大輪換排陣，的確影響球隊戰鬥力。但今仗對住有「車仔雙雄」的FC上海，相信費Sir亦不敢怠慢，會派出香川真司、貝碧托夫、路爾斯華倫西亞等主力迎敵，紅魔鬼有心一洗頹風，打場漂亮勝仗。

講到搞噱頭，FC上海於中超可謂首屈一指，不但簽下杜奧巴同安歷卡兩大著名射手，並請到前阿根廷國家隊領隊巴迪斯達任教。最搞笑係昨日有個有關「FC上海老闆朱駿對曼聯之戰應否出場」的網上民調，結果有逾八成球迷支持他上陣，而朱老闆亦曾於07年對利物浦的商業賽披甲，連巴迪斯達都話好期待他同杜奧巴並肩作戰，因此他「御駕親征」絕不為奇。
曼聯防線新仔多

事實上，FC上海於這場波前後都要南下廣州打中超，下仗更要對住一哥恒大，在兩頭撲下亦現疲態，該隊早已表示「車仔雙雄」唔會踢足90分鐘，加上曼聯後防人腳唔齊會重用新仔，未必頂得住「魔獸」杜奧巴的衝擊，預計雙方今仗娛樂至上，合演一場入球盛宴，入球大屬正路之選。