薩爾斯堡復仇開入球騷

猪拉多纳

歐聯外圍賽嚟到第2圈次回合，今晚有奧地利冠軍薩爾斯堡主場迎戰盧森堡奇兵杜迪蘭治，呢個對碰本來冇乜懸念，誰不知薩爾斯堡竟於首回合倒灶作客輸0:1，次回合返主場肯定毫無保留狂攻，撞啱客軍火力亦唔弱，今仗入球大細中位數改做3.5球，不妨捧1.95倍入球大。（開賽時間：周三凌晨0:00）

薩爾斯堡上場嘅表現確實走晒樣，仲畀教練羅渣施密特狠批為「不能接受」，但係佢就話隊波今場必定盡地一煲。其實薩爾斯堡上場都撳得住杜迪蘭治嚟踢，只係後防一個失誤就畀敵軍偷雞成功，今次返到主場，只要保持到一貫水準，要入多幾粒扭轉敗局唔係問題。
杜迪蘭治火力唔曳

可惜薩爾斯堡中場斯雲圖因為十字韌帶撕裂要抖半年，對於整體發揮一定有所影響，何況杜迪蘭治射手A.佐基姆於今屆3場歐聯外圍賽攻入5球，狀態大勇，就算大敗亦有機會破蛋，同薩爾斯堡合演入球騷。

首回合：薩客負0:1