保地花高無力掘「甘」施多夫巴甲首演靠唔住

猪拉多纳

聽朝巴甲焦點大戰，肯定係有荷蘭中場施多夫處子登場嘅保地花高，主場硬撼由前巴西國腳艾蘭奴孭飛嘅甘美奧。兩個世界級中場比併本來好睇過戲，可惜施多夫始終久疏戰陣，加上陣前缺操，未必帶得起班波，保地花高要讓波梗係捧1.82倍「讓球客勝」啦！（開賽時間：周一清晨5:30）

前荷蘭國腳施多夫自從喺5月告別AC米蘭後，就一直都冇比賽，到今個月初加盟保地花高後先重投操練，口口聲聲話好期待巴甲首演嘅佢，前日朝仲突然缺操，只可以留喺Gym房練肌肉體能，今仗落到場有冇貨交？踢唔踢得足？統統都難講。

雖然保地花高主帥奧利華拉話會安排施多夫踢番平時喺AC打開嘅左中場位置，但查實喺練波期間，就咩位都叫佢試吓，當正佢打天才波都得，不過冇默契真係畀個美斯你都冇用啦！賽前仲有消息話中場指揮官艾傑臣都傷埋，點贏波？
甘美奧新兵艾蘭奴對辦

喺聯賽排名高過保地花高一位嘅「四哥」甘美奧，實力當然唔簡單，自從中場艾蘭奴由山度士加盟後即刻取得兩連勝。雖則話甘美奧今仗有前鋒基拔停賽，好彩艾蘭奴來投後同射手馬些路摩連奴夾得鬼咁好，後者近兩仗就入3球，強勢出擊，作客都有權攞分走。