川迪技勝一籌響勝「古」

猪拉多纳

由麥卡倫領軍嘅川迪講唔上係荷甲一線勁旅，剛啱仲有射手盧克迪莊過檔慕遜加柏添，但整體戰鬥力依然高過芬蘭球隊國際杜古幾班，況且陣中幾位主將都及時傷愈，今晚喺歐霸盃第2圈外圍賽主場出擊，料可先下一城，讓兩球照捧2.05倍「讓主」。（開賽時間：周五凌晨1:45）

川迪今仗有門將米凱洛夫同右閘干尼利斯傷愈，新加盟嘅丹麥中堅比積蘭特嘅表現亦都相當對辦，加埋由天主教大學來投嘅翼鋒菲臘比古迪利斯已經完成註冊手續，主帥麥卡倫基本上可以派強陣出擊。

雖然盧克迪莊離隊，唔多唔少會削弱川迪嘅鋒力，之不過由教練團成員古華特親手栽培嘅基耶斯，賽前就突然獲提拔上一隊，兩課操練嘅表現更加係光芒四射，呢件秘密武器今戰肯定大派用場。

國際杜古雖係芬超一哥，衰在芬蘭足球水平不嬲都唔入流，畀你喺本土也文也武又如何？更何況正選門神巴尼因背傷冇隨隊，助攻王奧查拉早幾日又扭計話想過大會，首回合造訪川迪唔慌有運行。
歐霸盃賽制：

今輪為第2圈外圍賽，採主客兩回合制，若兩回合總比數賽和，以作客入球較多一方取勝。若作客入球數字相同，則在次回合90分鐘後加時30分鐘；若加時雙方取得相同數量入球，作客球隊晉級；若加時互交白卷，則互射12碼決勝。