迪高續約捧富明尼斯「讓主」

猪拉多纳

奧運仲未開鑼，主流聯賽又未開波，搞咩好？小妹建議大家留意英超列強熱身賽之餘，都不妨玩下巴甲啦！聽朝富明尼斯主場對巴希亞，小妹就力撐近況弗到漏嘅主隊，1.9倍「讓主」絕對捧得過！（開賽時間：周五早上8:00）
巴希亞啞火作客腳軟

小妹咁睇好富明尼斯，皆因佢哋係今季巴甲到依家為止，唯一不敗球隊！除咗射手費特同森姆爾羅沙近排頻頻入波，星級中場迪高早幾日決定續約，大大提升成隊波嘅士氣，就算門將迪亞高卡華利尼未必出得，小妹預計佢哋同上場鬥保地花高一樣，可以掌控比賽主動權，對住啞火嘅巴希亞，後防受嘅考驗應該唔會太多。

巴希亞無論睇戰績定睇人腳，都唔似贏到波，首先佢哋近8場作客都未贏過，仲要淨係入過2球咁大把，其中一位入球者中場法希爾，更因為累積滿3面黃牌今場要停賽，後防又有馬迪臣費拉及高爾浩雙雙缺陣，就算左閘阿雲尼及時復出，殘陣出擊，睇怕幾難抵抗擺出三箭頭攻堅嘅富明尼斯！