盧多格德斯擺明搏「薩」

猪拉多纳

盧多格德斯，咩嚟o架？等亨格比利介紹吓，呢支保加利亞新貴自前年獲注資後大事擴軍，上季稱霸保超後今晚首次出戰歐聯，喺第2圈外圍賽首回合對住薩格勒布戴拿模有得鍊，大膽啲博2.78倍主W。（開賽時間：周四凌晨2:00）
戴拿模唔齊腳又唔做功課

喺保加利亞甲、乙組聯賽打滾咗65年嘅盧多格德斯，前年獲財團收購後歷史性升班超級聯賽，首季已經連贏保超同保盃，上星期仲砌低普夫迪夫火車頭捧埋超級盃添！何況班球員講明要揚威首回合，當係教練柏迪夫嘅37歲生日禮物，夠晒鬥心喎！

對家薩格勒布戴拿模雖然係克羅地亞班霸，早排喺奧地利集訓熱身賽表現又幾好，可惜中堅施蒙歷同中場謝高歷高兩件最有「卡士」球星，分別因傷同停賽唔出得，隊長巴迪積賽前亦話唔清楚盧多格德斯係乜頭乜路，人腳唔齊、功課又做唔足，學咩人讓波呀？
歐聯外圍賽賽制：

採主客兩回合淘汰制，今輪為第2圈首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊憑作客入球優惠晉級，若加時冇入球則互射12碼決勝。