射手基尼爭長約撐佐加頓斯

猪拉多纳

一世人流流長，總會有機會上位，但成功與否，都係睇吓自己點樣把握。佐加頓斯今晚喺瑞超主場對諾高平，就有射手基尼要靠入波創造命運，呢位半紅不黑球員，因為要用入波氹佐加頓斯畀份肥約佢，近排簡直着晒火，應該可以帶挈佐加頓斯開1.62倍主W。（開賽時間：周二凌晨1:00）
諾高平作客輸多贏少

佐加頓斯喺休戰前7場聯賽未輸過，聽落好似幾勁，實情期間佢哋只得1勝6和，完全撻唔着咁款。不過咁，歐國盃後佐加頓斯先以3:2打沉哥登堡，跟手以1:1逼和西里安斯卡，出身自樸茨茅夫嘅英格蘭前鋒基尼，連續兩場入波共有3球士哥，冇計啦，佢出道以來成個人球咁，唔畀心機入波容乜易又被踢走？

其實基尼喺06年被外借到加爾斯威過吓，但佢喺07年被艾夫斯堡收購，就踢極都冇料到，今季佢以外借身份為佐加頓斯攻入6個聯賽入球，已經係近年代表作，如果佢唔想返艾夫斯堡坐冷板，當然要入波氹佐加頓斯高層開心啦！對家諾高平近6場作客得2勝4負，多數腳軟隨時畀基尼射爆。