細哨攞公民獎沖喜撐明尼路

猪拉多纳

明尼路新季戰績起飛，除咗話大軍陣容變動少夠晒穩定之外，加入朗拿甸奴（圖右）呢位過氣球王亦都令成班波如虎添翼。「細哨」剛啱攞咗公民獎沖喜，射手古靴美美賀梅亦都可復任正選，造訪低迷嘅費古倫斯值得秤先，捧2.38倍客勝。（開賽時間：周日清晨5:30）

聯賽3連捷嘅明尼路家陣坐喺巴甲榜首，陣中球星「細哨」雖然只係加盟咗個幾月，但日前就獲貝路賀利桑迪市頒發公民獎，呢位過氣球王重新被民眾捧上天，今鋪仲唔加多兩錢肉緊報答班Fans咩！上仗缺陣嘅鋒將古靴美美賀梅已經傷愈，教練古卡可以派強陣出擊。
費古倫斯連續7場失分

主隊費古倫斯連續7場聯賽失分，當中只係得6球進帳，會方於是向保地花高借入艾比奧同卡奧，主帥富克斯賽前仲話會畀佢兩個擔正，務求加強鋒力。有「瘋子」之稱嘅35歲烏拉圭射手艾比奧，前日首次參加操練即刻有波入，狀態睇落唔錯，不過費古倫斯一下子塞兩位新兵入正選陣容，可唔可以即刻同班手足擦出火花係一大疑問，以佢哋嘅沉態唔似會頂得住明尼路喎！