近6戰5勝地震嚇走海灣者

猪拉多纳

歐國盃今晚冇賽事，聽朝就得番4場美職聯賽盃上演，講到呢個花旗盃仔，西雅圖海灣者就最耍家，呢支3屆衞冕冠軍當然想創造歷史，破天荒締造4連霸，之不過亨格比利就唔多睇好嘞！事關呢班波近期沉到爆，最慘係臨危受命嘅門將梅里迪夫騰雞到震，聽朝8強喺三藩市中立場鬥聖荷西地震唔似有好下場，一於捧2.2倍主W！（開賽時間：周三早上10:30）
海灣者後備門將靠唔住

海灣者呢排跌晒Watt，連續7場聯賽失分，仲打破埋球會最長不勝紀錄。自從門將基斯樸寧打柴後，梅里迪夫連續8場擔正，只係得1場保住清白之身，主力射手伊斯查達又因為做手術要抖到7月中，單靠費迪蒙迪路單天保至尊邊度Work o架？

相反聖荷西地震就愈戰愈勇，剛啱先喺聯賽連續作客砌低急流同鹽湖城兩隊硬嘢，近6戰贏咗5場，賽會仲落實4強戰會喺佢哋主場上演添，無疑為贏波晉級增添動力。呢班波今季咁猛，皆因2010年金靴獎得主雲度路斯基腳風順到爆，又有馬達查維斯同拜達斯侯亞兩位好幫手為佢提供彈藥，睇怕海灣者想輸少球都難咯！
美職聯賽盃賽制：

今輪為8強戰，以一場過分勝負，若法定時間內打成平手，則需加時作賽，再和則互射12碼決勝。