法國踢務實足球鬥「狂牛」

猪拉多纳

前晚歐國盃八強戰，葡萄牙憑C朗一箭定江山小勝捷克，正如我賽前所料，雙方都打得小心翼翼，唔敢貿然出擊。葡萄牙領隊保羅賓圖係防中出身，深明先做好防守、保持不失嘅重要性，再等機會作出致命一擊，其實捷克表現唔算曳，尤其是防守方面，但彼此嘅分野，在於捷軍冇好似C朗咁銳利嘅攻擊手，最終輸波亦無話可說。
穩守突擊先係致勝王道

葡萄牙贏波，再次證明穩守突擊，方為致勝王道，呢種勝利方程式唔係乜嘢秘密招數，只係在於球員嘅心態及對戰術嘅執行能力，就像上季歐聯車路士點樣見關過關，尤其係戰勝巴塞同拜仁之役，都係採用此法，最終球員眾志成城下，成功守住勝果。

今晚法國面對「地上最強」西班牙，法軍主帥白蘭斯係中堅出身，明知自己唔夠砌，因此他會在防守上擺更多心思，以務實足球跟「狂牛」周旋，唔會傻到自暴其短，跟西班牙打對攻，因為咁樣同做烈士冇分別，盞死快啲。以法國前線賓施馬、列貝利、文尼斯嘅速度，要打出有效嘅穩守突擊，並非難事。

何況冇咗射手韋拿嘅西班牙，唔係想像中咁銳利，而中場大腦沙維又老兩年，少咗好多致命直線傳中波，之前對住意大利同克羅地亞，該隊嘅進攻總係隔靴搔癢，前線無論用費蘭度托利斯定係法比加斯，都冇乜改善，只要法國矯正心態做好防守，「地上最強」未必咬得入佢哋，隨時「守」出一條生路。
金句：

白蘭斯對地面最強唯一生路從守做起