窮希臘唔驚富德國

猪拉多纳

歐國盃8強今晚有德國對希臘大戰，兩隊除咗要爭晉級，亦要為國家面子而戰。受歐債危機影響，兩國政治同經濟關係緊張，為公為私，被形容為「窮人」嘅希臘就算實力低一線都唔會退縮。加埋賽前佢哋勁練死球攻勢，擺明想搏命同「富翁」德國鍊一鋪，受讓1/1.5梗係要2.07倍下盤撐佢哋再創神話喇！（now632台、廣東體育及中央5台周六凌晨2:45直播）
希臘設買飛熱線谷Fans入場

歐債危機風波牽連全球，「亨利」唔識經濟都成日聽到新聞話，希臘經濟瀕臨破產，大債主德國唔想救又焗住要救。總之家陣兩國國民互相憎恨，今場「富豪鬥窮人」隨時連場外都一樣擦出火花。據聞由於今場波賽前仲有飛賣，希臘足總已經成立買飛熱線，希望谷多啲Fans入場，贏唔贏波都好，聲勢一定唔可以輸。

事實上，「亨利」睇到上場希臘爆冷淘汰俄羅斯出線後，舉國歡騰，十足當年贏咗歐國盃一樣，根本全國上下都期待住球隊再創佳績沖喜吓。今仗賽前有唔少希臘球員都表明要為國民而戰，始終國難當前，匹夫有責，為國搏命嘅決心大過天。
德國讓得多唔穩陣

再者，「亨利」睇好希臘係因為好欣賞佢哋嘅鐵桶陣式，防守實在非常穩健，德國根本冇把握喺法定時間內擊敗佢哋。更重要一點係，「亨利」收到風希臘連日來練波除咗練好防守，竟然都加強以連尼斯同沙賓基迪斯嘅兩翼側擊，以及角球同死球戰術，似乎係想奇招突出，殺德國一個措手不及咁話，認真唔係講笑。

「富豪」德國雖然喺分組賽3戰全勝，表現突出，不過講到底，入得8強都有一定實力，你估希臘真係會任你魚肉咩？當然，德國可以強陣出擊，牌面睇點都秤先多少，但「亨利」始終認為希臘鬥志驚人，就算輸波都唔會慘敗，捧下盤受讓得多，輸一球都有半格執，一旦踢出水準守得住90分鐘，就真係乜嘢事都可以發生喇！
橫數千軍

德國正式賽事14連勝

‧近2次打入8強後，均順利進身4強，包括08年3:2勝葡萄牙，及96年2:1擊敗克羅地亞。

‧正式賽事14連勝。

‧唯一一隊3場分組賽全勝出線，3場都先開紀錄。

‧馬里奧高美斯喺首2場分組賽均成為首名入球球員。

‧近10屆出席決賽周，有6次打入決賽，3次成功捧盃。
希臘近6戰5開細

‧唯一一次打入8強係04年，當時以1:0淘汰法國，最終更奪冠。

‧曾於南非世盃外圍賽與德國碰頭，當時主場負2:4、作客輸0:2。

‧分組賽得1勝1負1和出線，3場都只係攻入1球。

‧04年奪冠陣容中，依家只剩低加拉高尼斯、加素蘭尼斯及查爾基亞斯。

‧近6場賽事有5場開細，近8仗每場都只入1球。
亨利推介：

希臘（下盤）