小保加發火搵智大做出氣袋

猪拉多纳

聽朝繼續有自由盃上演，揸住兩球領先優勢嘅小保加，啱啱先至輸波冇咗個阿甲榜首位置，全隊上下一肚火講明搵智利大學出氣，加上有多位主將復任正選，去到智利大學地頭都有得鍊，1.88倍「讓球客勝」抵玩！（有線61及201周五早上8:15直播）

小保加上場聯賽無啦啦輸鑊勁，主場狂吞沙蘭迪兵工廠3蛋由榜首跌到落第3，完場後成班球員嬲到唔接受訪問，得列基美（圖左）留低敷衍吓記者，主帥法斯安尼賽後向阿根廷媒體《playfutbol》表示，聽朝會以報仇心態搵智利大學出氣，證明今戰決心係幾大。
智大焗攻貪勝不知輸

雖然陣中後衞恩沙奧拉迪左腳足踝受傷冇隨隊，不過另一守將基文迪洛迪古斯已告傷愈，上場聯賽休戰嘅中場艾菲迪、柏保路列迪斯馬同前鋒辛迪亞高馬田施華亦會復任正選，戰鬥力同鬥心同樣唔需要懷疑。

首回合作客輸0:2嘅智利大學，聽朝返到主場焗住要搶攻，奈何攻擊中場洛雲施迪同悍將艾斯維度都打咗柴，攻、守兩瓣都受到削弱，點睇都難阻小保加殺入決賽喎！

（首回合：智客負0:2）
自由盃及巴西盃賽制：

採主客兩回合淘汰制，今輪為4強次回合，若總比數相同，作客入球較多一隊晉級，再和則於次回合後隨即互射12碼決勝。