葡萄牙勢擒捷克

猪拉多纳

雖然葡萄牙首場分組賽一球不敵奪標熱門德國，但整體發揮唔差得過對手。及後連挫丹麥及荷蘭，足證葡萄牙實力有幾強。而最重要係隊長C朗重拾射門鞋，喺對荷蘭時連入兩粒。查實大家都知道C朗入球能力有幾勁，頭兩場分組賽未有「士哥」只不過係信心問題。既然對荷蘭一役能成功突破心理關口，今場對捷克理應有更佳演出。

留意到08年由奧地利及瑞士合辦嘅歐國盃，葡萄牙已與捷克有過對賽紀錄，當時葡萄牙以三比一輕取對手，而C朗都有入球。四年後雙方又再碰頭，葡萄牙有力再贏捷克。
捷克出線已超額完成

捷克能以A組首名晉級，除咗話球隊有運之外，亦與同組球隊表現差劣有關。假設今次歐國盃捷克被抽入死亡B組的話，相信佢哋早就出局，點會咁叻仔入到八強。而捷克能夠打到入淘汰賽已經係超額完成，唔好對佢哋有太大期望。
歐國盃對戰勝負各一

捷克同葡萄牙史上先後兩次交手，兩場均屬歐國盃賽事，雙方96年於歐國盃8強首次對戰，當年捷克憑普波斯基一箭定江山，成功踢走對手，最終取得亞軍。12年後，葡萄牙於歐國盃分組賽再戰捷克，結果戰勝對手成功復仇，現時隊中王牌球星C朗射入第2球，協助球隊再度領先，屬贏波功臣之一。
交手往績

日期 賽事 賽果

11/06/2008 歐國盃 捷　克*1:3(1:1)葡萄牙

23/06/1996 歐國盃 葡萄牙*0:1(0:0)捷　克

註：*為中立場