想翻生要贏多過1球 荷蘭夜葡開大片

猪拉多纳

死亡B組亂到七彩，4隊都仲有出線機會，今晚小組包尾嘅荷蘭鬥葡萄牙爭出線，至少要贏2球先有機會趕上8強尾班車。究竟佢哋可唔可以心想事成我唔知，不過就肯定荷蘭會焗住搶攻，加上葡軍賽前有名將尤西比奧探營激勵士氣，C朗隨時大爆發，捧1.65倍入球大實冇衰！（now632台、廣東體育及中央5台周一凌晨2:45直播）
荷蘭轉着黑衫求轉運

睇完兩場荷蘭比賽，如果係「橙迷」嘅話，屋企多幾部電視機都唔夠掟爛，6個字足以形容佢哋表現：「攻不銳，守不穩！」上場對住德國，上半場畀對手控制戰局，打雙防中嘅尼祖迪莊同雲邦美好似隱形咁。中場任由德國魚肉，中間可以任得「小豬」輕鬆傳波，結果就係畀佢兩次直線劏穿防線，交畀馬里奧高美斯省兩粒搞掂。

荷蘭後防差大家有眼見，但一對防中同2年前世盃相比完全走樣，嗰陣幾乎見人就飛，一腳撐落人哋心口嘅尼祖迪莊，依家火氣唔見晒，雲邦美又年紀大活力減。加埋前面「毒扭」洛賓全無貢獻，個波去到佢腳下，同喺紅隧一樣「例塞」，真係睇見都眼冤。「配合」埋左邊唔多覺佢落咗場嘅阿費利，雙翼齊跛同打少兩個無乜分別，今日就算第一次轉着黑色作客波衫都好難轉運。
葡萄牙尤西比奧探班

最慘係領隊雲馬維克死唔變陣，依家荷蘭最大問題係打唔入對方心臟地帶，同時又欠缺一個正箭頭去引開對手，等史奈達同尹佩斯更多空間去做嘢，上仗下半場亨迪拉爾打正箭頭，起碼牽制到對方走位。據聞雲馬維克今仗話會變陣出擊，「亨利」希望佢會聽吓我講，等佢哋變番荷蘭原本家波。

對手葡萄牙上仗能夠絕殺丹麥，係贏在佢哋個人質素較對手優勝，以及有效率嘅快速反擊。尤其係中場摩天奴同拿尼兩個好波之人，玩到丹麥後防「陀陀擰」，只要C朗及時弗番，葡萄牙想入番幾球應該唔難。佢哋依家處於生死關頭，前日仲有名宿「黑豹」尤西比奧探班，我相信對士氣肯定有幫助。講真，你哋問我今場邊隊會贏就答你唔到，但場波一定會快上快落，簡單啲買個大就最穩陣喇！
亨利推介：葡萄牙（入球大）

橫數千軍

 葡萄牙近10次交手僅1敗

 ‧5次打入決賽周，均未嘗於分組賽出局。

 ‧連今屆在內，近5屆14場分組賽得10勝1和3負，其中8次開大。

 ‧近10次對荷蘭，得1次落敗。

 ‧射手普斯迪加連續3屆取得入球。

 ‧連續4屆小組首名出線。

 荷蘭近20場分組賽得10勝

 ‧過去8次打入決賽周，5次至少躋身4強。

 ‧連今屆在內，近7屆20場分組賽得10勝4和6負，其中11次開細。

 ‧10次對葡萄牙，有6次未能取得入球。

 ‧近6次對葡萄牙均未能獲勝，得3負3和。

 ‧今屆係連續第6屆打入決賽周。