靠晒你啦！尹佩斯

猪拉多纳

歐國盃已經去到分組賽尾聲，今晚就會上演「死亡B組」最後一輪賽事，呢一組真係難搞，荷蘭堂堂世界盃亞軍表現又真係令人超級失望，我聽克勤、大哥瑜佢哋討論時話洛賓獨食，雲邦美表現又麻麻，雲達華治同古積特又離奇地做後備，好彩仲有個尹佩斯……我即刻問佢哋咁荷蘭係咪一定無得出線，佢哋分析過我知，就話荷蘭想出線要贏葡萄牙兩粒以上，仲要丹麥輸畀德國囉，真係要睇班球員鬥心，同埋可唔可以搵番對射門鞋，依家得尹佩斯入過一球，睇嚟今場生死戰都係要靠佢囉！
做直播學「爆肚執生」

其實，今次做歐國盃我唔單止多咗好多出鏡機會，我仲嘗試咗好多新嘢，好似即場整嘢食咁就係新經驗。之前一直做102台，主要跟娛樂料，做節目做訪問同拍外景，但係今次見到克勤、忠仔、大哥瑜、積Sir、依雯佢哋做直播嗰時嗰啲反應，好快就可以配合到其他人，仲要有好多時係之前冇夾過，或者冇預計過會發生咩事。對住波齡尚淺嘅我，好有耐心咁教我，同我講波經，爆肚點執生嘅經驗，真係捱到熊貓眼出晒嚟都有賺，惟有敷多幾次mask急救啦。