德國大埋丹麥

猪拉多纳

歐國盃死亡B組最後一輪賽事，出線熱門德國挾兩連勝強勢迎戰丹麥，德國只要添一分即可首名晉級，以往德軍經常算死草計埋走線，不過，今時今日德軍兵力之強，何須計埋啲縮數，信佢同丹麥鬥攻，有望上演入球騷，捧大！（now 633及635周一凌晨2時45分直播）

德國今屆帶齊最強進攻武器出征，淨係前面一個馬里奧高美斯已經橫掃葡萄牙及荷蘭防線，「超級馬里奧」兩戰入三球，盡洗敗家仔形象，唔使老牌前鋒高路斯落場搏殺。高路斯近期患眼疾，搞到眼紅紅，但家陣馬里奧高美斯腳風正順，呢位老將可安坐後備席睇師弟仔落場建功破敵。

睇番死亡B組形勢，德軍揸住六分，今場和波已可鐵定首名出線，不過，呢支「日耳曼兵團」被譽為近年最強，連馬里奧葛斯同馬高列奧斯等新星都要坐冷板，面對區區一隊丹麥，使乜計住計住和波就夠數啊！以現時德國之勢，蘇豪認為佢哋根本唔使諗走線問題，踢番自己波邊隊都唔驚！
丹麥中堅賓衝得吓

德國未肯定出線，相信主帥勒夫唔敢大幅度調整陣容，今場主要變動係右閘，謝路美保定要坐波監，預計由拿斯賓達頂上，對防線影響唔大。中前場方面，舒韋恩史迪加及奧斯爾等猛將慢慢進入狀態，兩人傳射皆能，能為馬里奧高美斯提供大量靚直線，睇怕丹麥都頂唔到幾多嘢。

丹麥進攻重心落喺中鋒賓特拿身上，呢位「空中霸王」上場鬥葡萄牙頂入兩球，一洗「中堅賓」污名，現時信心甚強，今場會繼續喺前線衝鋒陷陣。丹麥要搶分爭出線，唔會縮得太後，預期雙方將踢得開放，丹麥不斷空襲對手，希望撞入一球半球，德軍亦唔會手軟，兩軍駁火，有利開大！