札幌傷兵成籮仙台抵博

猪拉多纳

來自北海道嘅札幌岡薩多仲黑仔過英格蘭，傷兵幾乎夠砌成隊波出嚟。仙台維加泰今日喺日職主場對札幌岡薩多，唔使諗咁多一於熱捧1.77倍「讓球主勝」，事關札幌教練石崎信弘已經輸到亂晒龍，呢場佢打算派30歲「高齡新人」杉山哲把關，亂咁嚟博轉運，隨時輸到甩轆。（now633台周六下午12:30直播）
仙台近4戰贏3場

日職休戰前維加泰以2分騎住廣島三箭，依然有機會重演上季柏雷素爾好戲奇迹封王。雖然中場關口訓充同後衞上本大海最近受傷，難免影響維加泰戰鬥力，不過今季攻入6個聯賽入球嘅射手赤嶺真吾好番，據講會踢番正選，既然佢哋連盃賽近4場有3勝1負，重新上力當然抵捧。

對手札幌岡薩多係包艇球隊之餘，原本已經傷兵滿營，近日較有作為嘅必然正選前鋒前田俊介同後衞奈良龍樹都大腿肌肉撕裂，而且教練石崎信弘輸到心慌，上場札幌喺日聯盃以2:2打和廣島三箭，後備門將杉山哲打得好些少，就話會喺呢場擔正，但其實佢之前効力鹿島鹿角8年，從未喺日職上陣，靠佢打救盞嘥氣！