俄羅斯突擊攞命

猪拉多纳

今晚歐國盃上演A組分組賽尾輪，雖然希臘出線尚未絕望，可惜攻力麻麻，在必須取勝才有機會出線下，該隊惟有焗攻，但對住突擊厲害嘅俄羅斯，希軍自暴其短盞死快啲，相信「北極熊」俄羅斯可贏波晉級。（now 633及635周日凌晨2時45分直播）

希臘一向以防守為安身立命，一來04年靠此調奪冠影響深遠，二來陣中前鋒如基卡斯、森馬拉斯等都唔係好貨色，加上佢哋嘅防線尚算穩健，喺失球數字長期「低企」下，領隊費蘭度山度士沿用穩守突擊並無不妥。可惜，由於希軍目前喺小組只得一分，今仗一定要贏波才有一線生機，費帥被迫改踢不擅長嘅進攻打法，令防線暴露更多空位，隨時搞到兩頭唔到岸。
迪沙高耶夫做殺手

俄羅斯喺老帥艾禾卡特帶領下，演出四平八穩，喺三位防中舒洛哥夫、沙里恩洛夫及丹尼素夫牢牢鎖住控球權下，希臘球員連組織進攻都成問題。單箭頭基沙哥夫走位飄忽，經常拉散對方防線，為「影子殺手」艾沙維同迪沙高耶夫製造更多入楔機會，後者成為最大受益者，此子兩場入三粒就係最佳證明。

其實俄羅斯尚未奪得出線權，最穩陣做法係擊敗希臘，就唔使理同組另一場波蘭對捷克嘅賽果，因此鬥心毋須懷疑，加上擁有炙手可熱嘅迪沙高耶夫，搞到希臘進攻不成更加「火燒後欄」，客勝屬不二之選。從近仗所見，希臘長傳急攻為主，預料角球唔會多，呢場特別項目投X，角球細值得一試。