狂牛撞死愛爾蘭

猪拉多纳

雙雄鬥變陣C組搏殺！西班牙首仗排出零前鋒陣式驚險逼和意大利，今晚C組Round 2出戰愛爾蘭，主帥迪保斯基喺強大壓力下，預計會變陣用番正中鋒，費托、尼格度係首選。畢竟鬥牛兵整體實力凌駕對手，今場唔難大捷開齋，1.8倍「讓球主勝」冇走雞啦！（now632台、廣東體育及中央5台周五凌晨2:45直播）

西班牙首戰出乎意料地搵中場法比加斯串演前鋒，睇番鬥牛兵大軍名單，其實正前鋒位置根本有「王子」費蘭度托利斯、今季喺畢爾包弗到震嘅洛蘭迪，同埋尋晚分隊賽打正選嘅西維爾射手尼格度可以選擇。
西班牙放球員「Happy」12小時

領隊迪保斯基賽後解釋，上場排陣係想確保有較多控球權，亨利其實好認同佢嘅睇法，始終同組嘅意大利同克羅地亞唔係泛泛之輩，尤其係意大利實力同佢哋只係不相伯仲，第一場雖然打和其實都已經收貨。事實上，整場比賽西班牙的確做到佔得較多控球權，若非「藍衫軍」後防發揮超水準，睇怕幾難頂得住佢哋細膩嘅小組入楔！

不過成敗論英雄，西班牙首戰失分，迪保斯基嘅零前鋒陣式自然備受壓力，包括名帥莫連奴同阿拉干利斯都怒轟迪帥新陣冇料到，似乎今晚佢哋唔變唔得。老實講，鬥牛兵今晚對住同組實力最弱嘅愛爾蘭，其實點都會踢得更加進取，依家消息話迪帥會擺番費托打箭頭，快翼捷西斯拿華斯亦隨時上陣搏殺。而且上場鬥完意大利後，球員獲准同另一半相聚12小時「Happy」減壓，相信今晚落到場表現只會更加好。
愛爾蘭李察鄧尼紮住上

對手愛爾蘭上仗不敵克羅地亞，無論進攻同防守表現都好曳。賽前消息指，佢哋正選中堅李察鄧尼要帶傷上陣，發揮肯定受影響，前線沙恩朗又會取代奇雲杜里踢正選，火力隨時進一步削弱。仲有，「亨利」認為呢組最後爭出線或者要計到得失球，西班牙今鋪更加係入少球都唔制，隨時整場大開殺戒呀！
橫數千軍

西班牙「聖卡斯」不失球率達55%

‧卡斯拿斯為國家隊上陣132場，當中有73場保持不失球，佔總數55%，為國際賽最高紀錄。

‧上場控球率達60%，與法國並列最高。

‧近5屆13場分組賽得7勝4和2負，6場開大，7場開細。

‧連續15場正式賽事不敗。

‧上場對意大利時，沙維（113次）及布斯基斯（115次）傳球次數超過100次，之前只得前西班牙國腳哥迪奧拿有此紀錄。

愛爾蘭14場不敗告終

‧上場輸波後，14場不敗走勢告終。

‧陣中無球員有歐國盃決賽周經驗。

‧羅比堅尼、杜夫及李察鄧尼曾喺02年世界盃協助球隊打入16強。

‧領隊查帕東尼係歐國盃史上最老教頭。

‧對上唯一一次打入決賽周係1988年，當時3場分組賽全部開細。
亨利推介：

西班牙（讓球主勝）