身邊好多「國寶」

猪拉多纳

今晚到我要捱眼瞓，雖然Ｃ組冇我最鍾意嘅法國，不過有我第二最愛嘅意大利，同埋呢組出線嘅球隊就會同法國嗰組出線隊伍爭入四強，我當然要留意啦。知己知彼呀嘛，分分鐘我兩隊所愛法國同意大利會喺八強交戰！好彩，世界女排大獎賽聽日旁晚先再喺日本同佛山開戰，我都有時間補睡、補睡！
意大利係「第二最愛」必捧

前兩日聽到曼聯前名將約基話同我一樣撐法國攞冠軍，但係最大阻力就係西班牙，咁都係o架，呢班鬥牛勇士帶住世界盃冠軍銜頭嚟衞冕喎，當然會被睇高一線，仲有我支持嘅意大利都係有實力嘅球隊，正常嚟計，佢哋都係有實力問鼎冠軍o架，希望意大利今晚可以贏克羅地亞，保持晉級希望。

歐國盃令我身邊出現了好多「國寶」，無論係醫院，亦或係廠，定係朋友堆，都有好多對熊貓眼對住我，見到佢哋個樣好多時都忍唔住笑咗出嚟！作為運動員，見到人人都咁投入去支持一項體育賽事，好高興；而作為一個醫護人員，見大家捱夜，就要提醒大家要爭取時間休息，先至夠精神睇波！好想煲啲湯畀大家飲，等大家滋潤吓，可惜嘅係……我唔識囉！