意軍70年未贏過克國

猪拉多纳

意大利同克羅地亞歷來曾六次交手，除上世紀40年代曾經贏過外，其後五次對賽竟未嘗一勝，僅錄得二和三負的劣績。當中近兩次交手意大利都係輸波，其中2002年世界盃分組賽，意大利雖由韋利先開紀錄，但克羅地亞藉奧歷及列柏錫於三分鐘內先後建功，最終以2比1反勝對手。
迪拿達利 寶刀未老

呢位34歲前鋒上仗後備上陣即建奇功，為意大利打開紀錄，證明自己寶刀未老。事實上，迪拿達利近三季兩奪意甲神射手殊榮，屬於世界一級射手，絕對壓得住場。由於「神經刀」巴洛迪利靠唔住，加上「單刀夢遊」事件後，可能會被貶為後備，波連尼及基奧雲高仍然幼嫩，預料迪拿達利今場會擔正，成為意大利入波最大希望。
莫迪歷 魔笛追魂

克羅地亞兩位射手文迪蘇傑及謝拉域固然出色，但都要靠莫迪歷喺中場策劃及傳送，先至有機會入波。26歲嘅「魔笛」雙腳好似識變魔術，憑超卓閱讀球賽能力，作出致命妙傳劏開對手防線，而且具備遠射腳頭，能夠製造意外收穫，威脅力比前鋒有過之而無不及。曼聯領隊費格遜計劃重金收購佢，莫迪歷趁今屆賽事「騷哥利」，爭取成「魔」。
近六次交手往績

日期 賽事 賽果

17/08/06 熱身賽 意大利 0:2 克羅地亞

09/06/02 世界盃 *意大利 1:2 克羅地亞

28/04/99 熱身賽 克羅地亞 0:0 意大利

09/10/95 歐國外 克羅地亞 1:1 意大利

17/11/94 歐國外 意大利 1:2 克羅地亞

05/04/42 熱身賽 意大利 4:0 克羅地亞

註：*為中立場