地頭龍甘美奧強爆彭美拉斯

猪拉多纳

睇得歐洲國家盃多覺厭，不妨睇吓娛樂性豐富嘅南美波啦！聽朝巴西盃4強戰首回合，有走勢超勁嘅甘美奧主場迎戰响巴甲排尾二嘅彭美拉斯，小妹決定撐戰績同士氣都贏幾條街嘅主隊贏波，力捧1.65倍主勝。（開賽時間：周四早上8:50）

話甘美奧超勁，係因為佢哋嘅主場連勝紀錄已經去到12場，更連續7場都冇失過波，絕對唔係近6次作客得1勝嘅彭美拉斯可以抵擋。甘美奧已經講明希望攞好啲成績，吸引更多好似奧利里奧咁嘅高質歐洲回流球員，隊波又合作踢得鬼咁爭氣，唔怪得開波前兩日，4萬5千張飛已經賣清啦！今場有咁多擁躉撐場，梗係踢得好好睇睇報答班忠心fans啦。
彭美拉斯中場曾被綁架拒披甲

對家彭美拉斯喺新一季巴甲表現麻麻，4戰得1和3負排尾二，大戰前夕更發生不幸事件，智利中場佐治華迪維亞同太太上星期喺巴西遭綁架，雖然已經獲釋，不過佢嘅家人已經表明唔會再返巴西，呢位中場亦唔會上陣，士氣難免受影響。雖然小妹希望佐治華迪維亞可以盡快重踏球場，不過佢隊彭美拉斯今戰睇嚟都難逃一劫喇。

巴西盃及自由盃賽制：

採主客兩回合淘汰制，兩項賽事均為4強首回合，若總比數相同，作客入球較多一隊晉級，再和則於次回合後隨即互射12碼決勝。