火爆德國o趙荷蘭

猪拉多纳

歐國盃開波至今，最意外賽果肯定係丹麥爆冷贏荷蘭啦！咁叫得死亡B組，肯定場場波都咁有睇頭，今晚第2輪交鋒，就會上演「宿敵對決」。荷蘭同德國過往嘅牙齒印唔使多講，今晚「橙衣軍團」對住紀律好、實力強嘅德國隊，隨時做埋今屆賽事首支執包袱嘅球隊！既然德國前鋒馬里奧高美斯都要同拜仁隊友洛賓「絕交」咁有火，今場梗係捧佢哋2.3倍客W啦！（now632台、廣東體育及中央5台周四凌晨2:45直播）

「亨利」有個朋友係荷蘭死硬粉絲，佢話荷蘭88年歐國盃喺首場分組賽都係輸波，之後就過關斬將捧盃，今屆就算出閘脫腳都冇有怕喎！「亨利」唔係想潑老友冷水，但睇完第一場波，佢哋進攻節奏又慢又迂迴，首要為輸波孭鑊嘅，肯定係畀人狂炳嘅洛賓啦！
荷蘭唔變陣照用「獨扭賓」

每當個波落到洛賓腳下梗係拖慢哂，本來佢肯交吓波都無所謂，整鬼佢硬係要做「獨扭」，一個嘜佢係咁、四個嘜佢都係咁，總之一味死扭！「亨利」就真係戥佢啲拍檔陰功，都唔知上唔上去幫波好，上到去分分鐘跑咗幾十碼都掂唔到個波，然後又要急急腳走番轉頭，整整吓班隊友都冇癮喇，咪變咗「一人球隊」囉！

最大劑唔止「獨扭賓」，另一個打邊嘅阿費利、打前嘅尹佩斯都好似食咗豬油撈飯咁軟手軟腳，踢得好啲嘅只有史奈達一個，神仙都難變啦！聽講今場領隊雲馬維克唯一肯變只係後防出番個傷愈嘅中堅馬菲臣，前線會唔會改用亨特拉爾仲未知，講真，我始終認為除非荷蘭肯大變陣（但我覺得唔會囉！），先至有得救，否則「亨利」唔敢想像今晚對住德國點算！
小豬有輕傷或卻奧斯頂上

德國傳統都係軍紀嚴明、少犯錯，無錯上場贏葡萄牙算有啲幸運，但前中後三線配搭平均，加埋有個好龍門紐亞包底，陣容實在強勁。雖然消息指「小豬」有少少傷，臨場或改由卻奧斯頂上，不過無論出邊個，策動進攻能力都一樣咁好。

仲有，佢哋前線續用當弗嘅馬里奧高美斯，將老將高路斯擺後備又係明智之舉，賽前高美斯表明同洛賓唔係老友，擺明想喺今場賽前「絕交」，又反駁家陣做緊講波佬嘅名將史高爾對佢嘅批評，都不知幾好火。只要佢將呢兩股怒火擺落場，配合埋德國嘅快速整體戰，對住同南非世盃比跌晒Watt嘅「橙軍」，真係食「橙」咁食啦！
荷蘭近8戰正式比賽得3勝

‧亨特拉爾為外圍賽神射手，共入12球，但上仗只列後備。

‧陣中共有11名球員，係嚟自10年世界盃亞軍陣容。

‧連今屆在內，近7屆19場分組賽，共得10勝4和5負。

‧今屆之前只曾於88年首場分組賽落敗，但最終奪冠。

‧近8場正式比賽僅得3場獲勝。
德國斯文波少犯規

‧外圍賽犯規次數為各隊最少。

‧連今屆在內近4屆10場分組賽共得3勝3和4負，7次開細。

‧畢斯杜巴同謝路美保定各有1面黃牌在身，再領1面就停賽。

‧馬里奧高美斯上場對葡萄牙，上半場只觸球8次。

‧ 普多斯基今場上陣，便成為德國史上上陣次數第7多球員。
亨利推介：

德國（客勝）