往績半場例有波入

猪拉多纳

由七十年代開始，荷蘭、德國都視對方為歐洲球壇嘅頭號宿敵，雙方對上一次於大賽碰頭係二○○四年歐國盃分組賽打和一比一，當時有份落場而如今仍在陣中嘅球員包括德國拿姆、舒韋恩史迪加，荷蘭則有希汀加、保馬、雲達華治及史奈達。

連熱身賽，近六次碰頭荷蘭取得兩勝三和一負較佳成績，如以中位數2.5計，一共開出四大兩細，當中六場比賽上半場都有入球出現。
基迪拉 一夫當關

德國中場人才鼎盛，爭位踢情況極之嚴重，不過只有基迪拉嘅防守中場位置唔會受到動搖，德軍今次點兵冇考慮到同佢相同位置嘅舊將路菲斯同德拉舒，最後關頭仲放棄埋多蒙特嘅施雲賓達，足見領隊勒夫對呢位皇馬悍將信心十足，佢除咗搶截硬淨外，首仗對葡萄牙嘅唯一入球亦由佢助攻，進一步確立佢喺新德軍嘅核心地位。
雲邦美 備受質疑

踢法兇狠嘅雲邦美係荷蘭縱橫天下嘅沙場老將，一直受到領隊雲馬維克重用，不過已年屆35歲嘅佢體能下降係無法避免嘅事實，首仗負於丹麥佢嘅表現亦平平無奇，難怪同佢合作踢防中嘅尼祖迪莊唔滿意，點解下半場換入雲達華治時，係入替佢而唔係雲邦美。作為球隊隊長，雲邦美今晚必須交出優異表現，至可以令批評同眼紅者收口。
近六次交手往績

日期 賽事 賽果

16/11/2011 熱身賽 德國 3:0(2:0) 荷蘭

17/08/2005 熱身賽 荷蘭 2:2(1:0) 德國

16/06/2004 歐國盃* 德國 1:1(1:0) 荷蘭

20/11/2002 熱身賽 德國 1:3(1:1) 荷蘭

23/02/2000 熱身賽 荷蘭 2:1(2:1) 德國

18/11/1998 熱身賽 德國 1:1(0:1) 荷蘭

註：*為中立場