厄瓜多爾齊人贏得

猪拉多纳

世盃南美洲區外圍賽又有好戲，厄瓜多爾喺高原主場對哥倫比亞，1.9倍主W值得捧場。雖然厄瓜多爾剛啱慘吞咗阿根廷4蛋，但返到主場係另一個故事，何況哥倫比亞射手法卡奧今季應付球會賽事踢到氣咳，賽前佢更加話，擔心自己同隊友體能出現問題，咁搞法盞去高原基多送死。（開賽時間：周一清晨5:00）

咪以為厄瓜多爾以0:4不敵阿根廷就好蝦，查實佢哋喺外圍賽得2勝2負，主場對委內瑞拉同秘魯都贏波，而且今次陣容相當齊整，除曼聯翼鋒路爾斯華倫西亞同貝迪斯中場謝法臣蒙迪路，分別効力過伯明翰同燕豪芬嘅射手賓尼達斯同艾迪臣文迪斯都有入選，唔排除佢哋作客揸流攤留力。
法卡奧硬仗連場踢到殘

對家哥倫比亞日前以1:0砌低秘魯，但唔好以為呢場可以咁容易添食！事實上，近期同車路士甚至巴塞隆拿扯上關係，連續兩年成為歐霸盃神射手嘅馬德里體育會前鋒法卡奧，上場已經感覺到哥倫比亞唔多上力，而且話要諗辦法盡快恢復體力，否則作客高原基多會好麻煩。

梗係啦，今季法卡奧踢完今季西甲之後，更隨馬體會返祖國踢表演賽，今季夾夾埋埋踢咗超過50場比賽，而且上場對秘魯前至傷愈嘅中堅耶比斯，加盟AC米蘭之後坐多過踢，無論前線定後防重心狀態都冇保證，作客出事絕對唔奇。

南美洲區世盃外
賽制：

9支參賽球隊踢雙循環分組賽，小組頭4名直接進身2014年巴西世界盃決賽周，第5名則與中北美洲區第4名進行主客兩回合附加賽，決定出線席位。