山度士「讓客」搵到食

猪拉多纳

聽朝巴甲爆發聖保羅州打吡，好可惜撞正國際賽期兼傷病侵襲，搞到場波星光黯淡。雙方都有大堆主將唔出得，但山度士勝在有一對鋒將波捷斯同馬高斯迪姆巴及時復出，造訪中後場穿晒大窿嘅聖保羅照計搵到食，1.78倍「讓客」抵玩。（開賽時間：周一清晨5:30）

望一望個聯賽榜，山度士開咧3戰仲未開齋，鬼咩！適逢呢排係國際賽檔期，門將拉菲爾卡比爾同前鋒尼馬都唔在陣，右閘富斯尼同中場甘素又打咗柴，加加埋埋起碼有成8件主將缺陣，成績咁曳情有可原。
國際賽期雙方唔齊腳

嚟緊周中山度士會喺自由盃4強硬撼哥連泰斯，被問到會唔會留力應戰，主帥拉馬奴話得啖笑，事關佢連健健康康嘅球員都有限，所以今戰唔會諗咁多，揸頸就命盡量派最強地莊陣容落場同聖保羅死過。賽前佢老人家總算收到個好消息，就係一對前鋒波捷斯同馬高斯迪姆巴傷愈可候命，對鋒力唔多唔少有幫助。

主隊聖保羅開咧3戰贏過1場，唔叻得過山度士好多。路爾斯法比安奴今場波停賽，另一攻擊好手盧卡斯洛迪古斯為巴西國家隊出征，火力大減就梗㗎嘞！最大鑊係中堅羅度科傷小腿，教練里奧焗住要用早前因食禁藥坐咗一排波監嘅艾臣荷西鎮守後防，未傷愈嘅法比斯奧就代替缺陣嘅卡斯米路紮住上，中後場殘成咁學咩人讓波吖，唔輸都偷笑咯！