左右為難的歐國盃之夜

猪拉多纳

做咗兩日歐國盃節目，已經開始投入歐國盃狂熱，今晚有我都好鍾意嘅西班牙同意大利對碰，之前有朋友問我「點解會鍾意西班牙同意大利？」，我認真地答佢：「兩隊多靚仔囉！」

其實，我支持西班牙，係因為覺得佢哋打得好，上屆歐國盃睇到佢哋為贏波好團結又有鬥心，真係有團火。「王子」費蘭度托利斯、尼格度、沙維，加埋鋼門卡斯拿斯，個個有實力，打得又睇得，唔支持佢哋點得。而意大利有成日保住後方嘅保方，派路靚仔得嚟又打得，前面又有壞得嚟有好腳法嘅巴洛迪利，睇佢哋嘅穩守突擊好刺激。真係手掌又肉、手背又肉，都唔知點算好，惟有望佢哋打和啦，咁我會好過啲！
水果檔報紙檔老闆對撼

因為要喺歐國盃pre-show節目度做煮嘢食環節，我會先去行下街市先返廠，當我經過水果檔時就聽到老闆話支持西班牙，話佢哋一定可以打破過去紀錄成功衞冕。不過，隔籬報紙檔老闆就同我哋唱反調，支持意大利，仲話第一場意大利一定可以打贏鬥牛國。兩個老闆一人支持一隊，拗到面紅耳熱都幾好笑。