波蘭衰在個「龍」

猪拉多纳

波蘭衰在個「龍」歐國盃決賽周正式開鑼，東道主之一波蘭喺大好形勢之下打和希臘一比一，無疑令主場球迷非常失望。波蘭雖然有地利之助，而且上半場亦憑着主場氣勢而先開紀錄，可惜門將施捷斯尼換邊後接連犯錯，第一個失波如果唔係佢打空氣，後備入替嘅希臘前鋒沙賓基迪斯未必搵到入波機會。之後施捷斯尼再犯天條輸十二碼，如果唔係希臘隊長加拉高尼斯唔爭氣，施捷斯尼已成國家罪人。在現代足球入面，一些實力較次嘅球隊想爭取好成績，一名穩健嘅門將係最大關鍵，只有冇後顧之憂，球隊才能發揮領隊賽前嘅針對性部署。

另一邊廂，捷克雖有一名好門將施治，可惜其他球員老態龍鍾，巴路士離開頂級聯賽已有一段日子，路斯基亦已不復當年勇，球隊仍靠佢哋孭飛，可想而知青黃不接問題係幾咁嚴重。俄羅斯能夠大勝一場全因對手踢得差，係咪真係擁有捧盃實力仲係言之尚早。

講番今晚C組賽事，Peter認為和味濃，建議玩條二串三和波過關。先講重頭戲西班牙對意大利，西班牙今次唔齊腳，而且球員缺乏爭勝飢渴感，意大利牌面稍遜，但防守始終係佢哋強項，只要集中精神，守和鬥牛國唔係咩奇事。另一場愛爾蘭對克羅地亞，克軍個人技術較好，愛爾蘭則勝在有拚勁，名副其實係場五五波，打和機會亦相當高。

金句：波蘭勝在有主場、和在冇龍門