勝利船大開「薩」戒求反彈

猪拉多纳

日聯盃分組賽又開戰，神戶勝利船今日喺B組主場對札幌岡薩多，幾大都要捧2.45倍「讓球主勝」。雖然勝利船喺新教練西野朗帶領下，依然未止到血，但佢講過要進行「大久保再生」計劃，要求前鋒大久保嘉人「得點量產」（大量入球），對住散晒嘅岡薩多唔攞威等幾時？（開賽時間：周六中午12:00）
岡薩多喪失戰意

西野朗曾經帶領大阪飛腳稱霸亞洲，佢主張「超攻擊」打法，簡直係賭仔偶像，事關勁易開入球大吖嘛！雖然西野朗上任後連輸兩場，但佢始終係有料教練，佢上任後已經發現，勝利船前線入球能力不足，所以諗住搵効力過禾夫斯堡嘅大久保嘉人打正箭頭，希望佢大爆發，帶挈勝利船浮番上水面。

今場勝利船有射手都倉賢坐完波監復出，要知道岡薩多傷兵幾乎多到兩隻手數唔晒，除咗上場分組賽淨吞清水心跳4蛋，近期仲試過以0:7慘負鹿島鹿角，證明已經瀕臨喪失戰意，加上後衞諾夫被澳洲國家隊徵召，試問岡薩多有咩理由唔死先得o架？就算勝利船都有後衞伊野波雅彥入選日本大軍，點計都抵捧得多。

賽制：

由14支毋須參加亞冠盃之日職球隊角逐，分兩組踢單循環分組賽，每組首、次名躋身淘汰賽。