科特迪瓦象腿狙摩

猪拉多纳

世界盃非洲區外圍賽現時進行第二階段分組賽，今晚最好戲碼當然係C組，摩洛哥主場對科特迪瓦，「大象兵團」科特迪瓦近年已成為非洲最強球隊，今次Full Team出擊，杜奧巴、沙洛文卡勞及托尼兄弟都有入選，可強勢踩平摩洛哥。科特迪瓦僅小讓平半，上盤可取。

（周日凌晨4時開賽）

非洲球壇以前由喀麥隆及尼日利亞稱霸，但依家已成為科特迪瓦天下，皆因「大象兵團」人才輩出，淨係一個杜奧巴都已威震全球，耶耶托尼、高路托尼及迪奧迪亦能獨當一面，實力足以媲美歐洲及南美洲勁旅，唔擔心佢哋出線會有困難。科特迪瓦上輪二比○輕取坦桑尼亞，杜奧巴同沙洛文卡勞都有波入，可見佢哋踢外圍賽一樣搏命。
摩洛哥卡士輸蝕

至於摩洛哥雖然亦有唔少國腳喺歐洲搵食，但質素參差，最具名氣嘅查馬克長居阿仙奴後備席，唔可以同科軍英超兵相提並論，淨係睇吓摩洛哥上輪逼和弱隊岡比亞，就知佢哋冇料到。由於第二階段，只有小組首名可以晉級下一圈，科特迪瓦不作保留下，摩洛哥更難偷雞。