唔信邪今晚撐德荷

猪拉多纳

今年體壇頻頻出現冷門賽果，英超球隊車路士一次又一次爆冷，最終成功奪取歐聯冠軍，呢股冷風近期仲吹到去ＮＢＡ，證明隊際或者團體運動千變萬化，並非一定由強旅贏硬，呢啲亦係足球最引人入勝之處，仲令球評家成日跌眼鏡添！

不過，作為一個球評家，Peter唔能夠因為多冷門賽果就夾硬場場貼下盤，始終要以波論波，無論評波或推介都唔可齋捧Underdog，今晚都唔信邪，絕對唔會畀冷風影響。歐國盃死亡B組兩場賽事，荷蘭同德國中前場實力強，不但出線機會較高，甚至有能力雙雙殺入決賽，兩軍首次出擊，同樣值得睇好。
兩軍中前場人腳勁

先講頭場賽事，大家要知道丹麥依家實力一般，實在冇乜能力威脅荷蘭，「橙衣兵團」中場擁有史奈達、尼祖迪莊及洛賓等球星，前面若踢單箭頭可用尹佩斯，打雙箭頭就可搵埋亨特拉爾，進攻戰術多變，唯一隱憂係後防球員唔係個個都咁穩，不過，面對丹麥相信已經夠贏，預計荷蘭可以旗開得勝。

尾場德國對葡萄牙，葡軍只靠C朗單天保至尊，佢嘅踢法同拿尼非常相似，兩個一齊落場冇乜化學作用，反觀德國依家如日方中，今次值得捧場。Peter唔怕跌眼鏡，一於捧晒兩支B組熱門球隊啦！
金句：足球引人入勝之處係頻頻讓球迷同球評家跌眼鏡！