美國「-2」照追

猪拉多纳

安提瓜和巴布達係咩嚟？咪就係聽朝美國喺中北美區世盃外圍賽迎戰嘅對手囉！雖然奇連士文接手後嘅「阿美利堅」表現反覆，不過今次對住第1組實力最弱嘅安提瓜和巴布達，即使要讓2球，小妹都力捧1.65倍「讓球主勝」！（開賽時間：周六早上7:00）
安提瓜和巴布達板球場練波

「花旗國」上場悶和加拿大場波完全冇火，小妹真係差啲睇到瞓着，不過既然係熱身賽就算啦！今仗對手安提瓜和巴布達實力較弱，相信會以防務為主，不過美國有大演帽子戲法、助球隊大炒蘇格蘭5:1嘅當路雲，要入波又有咩好擔心先？加埋連當路雲都讚好嘅富咸射手丹普西，要數多客軍幾球，絕對唔係問題。

小妹初初見到安提瓜和巴布達呢個名都好疑惑，經過研究先發現諾定咸森林嘅布力史托及雷丁嘅利格活都係佢哋國腳！不過由於太遠水路，佢哋極少跟操，今仗未必隨隊，而且佢哋大部分係國內業餘球員，連國內嘅足球場都唔符合國際足協規定，搞到要喺板球場踢波，技術再好，今場都難免大敗喇！

賽制：今場為第3圈賽事，12支球隊分成3組，每組4隊，採主客雙循環賽制，勝出得3分，和得1分，負則0分。小組首、次名將進身第4圈。