歐國盃：俄羅斯「機動」部隊打殘老兵捷克

猪拉多纳

08年歐國盃4強分子俄羅斯自從換上名帥艾禾卡特接掌後，立即重拾前蘇聯「機動戰隊」本色，攻守極具效率，近排仲14場不敗添。今晚喺A組首戰火併又老又殘嘅捷克，唔難打響頭炮，小讓平半，1.94倍上盤要捧！（now632台、廣東體育及中央5台周六凌晨2:45直播）
踢法進取體能Fit爆

俄羅斯上屆喺荷蘭籍主帥希丁克帶領下，打出超水準殺入4強贏盡讚賞，可惜去到2010年卻無緣世盃決賽周。艾禾卡特就喺10年5月接手，將球隊重新改造，除將陣式改成「433」更進取之外，仲搵埋曾經做過威爾斯助教、荷蘭同南韓訓練團嘅體能訓練師奧達蘭特幫手，攻守效率明顯都大有改善。連同上場贏意大利，「雙頭鷹」近14場不敗兼只失4球，真係唔講得笑。

奧達蘭特日前就透露俄軍體能狀況如果以10分滿分計，已經有8至9分，情況令人滿意，佢仲預計去到淘汰賽階段會更Fit。事實上，俄羅斯陣中只得門將艾堅菲夫係傷兵，但由辛尼特門神馬拉菲夫頂替，一樣冇有怕。至於前線除咗有艾沙維同基沙哥夫等壓陣，後備席仲有柏夫里約真高同普格恩耶克兩支大炮，仲使驚冇波入？
施治：巴路士 路斯基都OK

捷克近年打嚟打去都係靠施治、路斯基同巴路士3個老將，可惜巴路士大髀有傷，連續兩日食藥冇操到，雖然《閃電報》尋日引述施治話：「路斯基休咗一排後，依家已經OＫ，巴路士個Case一樣。」但路斯基、巴路士始終年紀唔細兼傷過，夠唔夠狀態打90分鐘好成疑問，前線入波睇怕要靠晒被譽為「捷克美斯」嘅華拉夫比拿，不過A貨都係信唔過。只靠鋼門施治把守最後一關以守為攻，久守必失要對家好過啦！
橫數千軍

 俄羅斯已14場不敗

‧連續14場不敗，僅失4球。

‧歷來3次出席決賽周，均與當屆冠軍同組。

‧近5戰得2勝3和，但有4場開出入球細。

‧今個月進行3場熱身賽，半場全部0:0。

 捷克近5戰全開半場和

‧以捷克身份參戰，4屆均入決賽周，包括殺入96決賽及04年4強。

‧自去年10月不敵西班牙後，近6戰僅1負。

‧近5戰得3勝1和1負，半場全部開和。