日本細擒約旦

猪拉多纳

世界盃亞洲區十強賽賽事，Ｂ組出線熱門日本主場迎擊西亞新勢力約旦，日本主Ｗ熱至1.12倍，毫無投X價值。約旦近年水平不斷提升，絕非魚腩，預期日本會面對頗大阻力，小勝機會較高，蘇豪捧入球細！（now 671周五晚６時30分直播）
約旦硬淨咪當魚腩

名氣球隊日本擁有準曼聯球員香川真司，仲有星級左腳王本田圭佑，星味十足，上場仲以玩敵姿態三比○輕取阿曼，搞到今場Ｗ熱上加熱。日軍上仗大勝只因阿曼太曳，今仗對手約旦進步神速，控波同反擊能力都在阿曼之上，日軍今戰冇咁易贏。況且日本領先後向來猜住踢，鮮有狂攻到尾，如非對手太屎，好少大勝，相信約旦可以頂得吓，細盤分頭不俗博得過！

同日Ａ組烏茲別克作客黎巴嫩，烏茲別克上場鬥伊朗有個士哥入晒都被判詐胡，戰至補時更被對手射死，最終含冤慘敗，仲打爛埋教頭阿巴莫夫個飯碗。烏軍現時改由國內名牌球隊賓約哥主帥卡斯莫夫領軍，匆匆再戰，難望變身！烏茲別克上場狂攻伊朗都交白卷，把握力相當曳，今次客場出戰士哥唔慌多，可捧入球細。
澳洲冇態炒唔起阿曼

另外，Ｂ組名牌球隊澳洲於分組賽首度亮相，將會作客阿曼，兩隊繼上圈後再次被編入同組角逐，上次澳洲作客阿曼輸○比一，今次會打醒十二分精神，球隊擁有卡希爾及基維爾等星級球員，牌面睇落贏面較高，但眾星於球季收咧後不在最佳狀態，炒唔起對手，今場捧細！（now 671周五晚９時直播）
蘇豪心水推介

日本 細

黎巴嫩 細

阿曼 細