波蘭做東歎臘肉

猪拉多纳

歐洲國家盃揭幕戰，A組東道主波蘭登場對希臘，波蘭近年足球發展「德國化」，不惜放下民族恩怨，拜德國為師，今次23人大軍近三分一喺德國搵食，練得一身好本領。適逢波蘭主辦賽事，眾將士學成歸來，正係展示收成嘅好時機，劏「歐豬」希臘祭旗，賀歐國盃開幕，1.9倍主勝屬不二之選。（now632、660及無綫翡翠台周六凌晨零時直播）

二次世界大戰，德國入侵波蘭，於當地建立集中營，每逢提起傷痛猶在。不過足球世界內，輪到波蘭「入侵」德國，有大量球員去德甲及德乙効力，經過幾年磨練後，已成為德國球壇一股強大勢力，羅拔利雲度夫斯基、巴拉斯塞高斯基及比薛斯基更成為多蒙特奪聯賽兩連冠嘅主力，證明佢哋級數已達歐洲一線水平。
質高一皮兼有地利

當然波蘭整體實力仍未及上傳統勁旅，但有「多蒙特三子」在陣，可憑個人質素改變戰局，尤其係對手只係希臘，以波蘭現時人腳，配合地利優勢，勝算相當高。
希臘經濟困境冇Heart

一提起希臘，相信好多人立即想起歐債危機，國家隊亦一樣危機處處。首先，球隊一直食老本，時至今日仲要靠加拉高尼斯、尼高里貝路普路斯及加素蘭尼斯等老將打江山，即使有連尼斯等年輕球員冒起，但未夠班喺大賽擔大旗。

其次，希臘陷入經濟困境，球隊今次都要節衣縮食，出唔出到獎金，都成疑問，試問球員仲邊有士氣打仗。最後睇埋賽績，希臘史上八次作客波蘭，竟然全敗收場，實在搵唔到理由今次可以破宿命。